ගෝටගෙ පොත කියෙව්වෙත් නෑ, කියවන්න ඕනත් නෑ
තමන්ට ගෝඨාභය රාජපක්ෂ ලියූ පොත කියවීමේ කිසිදු අවශ්‍යතාවක් නොමැති බව පොහොට්ටුවේ නිර්මාතෘ බැසිල් රාජපක්ෂ පවසයි.
රූපවාහිනී වැඩසටහනකට එක්වෙමින් බැසිල් ප්‍රකාශ කරන්නේ තමා සතුව ගෝඨා ලියූ පොත නොමැති බව ය.
“ගෝඨාභය මට ඔහුගේ පොතේ පිටපතක්වත් දුන්නේ නැහැ,” ඔහු පැවසීය.
ගෝඨාභයගේ පොතේ ඩිජිටල් පිටපත ඔබ කියවා ඇත්දැයි රූපවාහිනී නිවේදකයා විමසූ විට බැසිල් රාජපක්ෂ කියා සිටියේ මේ දක්වා පොතේ එවැනි ඩිජිටල් පිටපතක් තමාට ලැබී නොමැති බවයි.
“මට ශ්‍රී ලංකා පොදුජන පෙරමුණේ මාධ්‍ය අංශයෙන් පොතේ පිටපතක් ලැබුණේ නැහැ,” ඔහු පැවසීය.
පසුව ඔහු කියා සිටියේ තමා පොත කියවීමටද අදහස් නොකරන බවයි.
“මේ පොත ගැන මගේ කිසිම තරහක් නැහැ. නමුත් ගෝඨාභය රාජපක්ෂ මහතා පොතක් ලිවීමට යන බවත්, එය සම්පූර්ණ කිරීමට විස්තර එකතු කරන බවත් මම නිල නොවන ලෙස දැනගත්තා,” ඔහු වැඩිදුරටත් පැවසීය.
නාමල් පවා පොත මිලදී ගත්තේ පොත් සාප්පුවෙන් බව බැසිල් රාජපක්ෂ කියා සිටියේය.
“ගෝඨාභය රාජපක්ෂ මහතාගෙන් පොත ලබා ගැනීමට මම බලාපොරොත්තු වෙන්නෙ නෑ. අපේ පවුල්වල වරදවා වටහාගැනීම් නැහැ. පොත මට නොදීම ගැන ප්‍රශ්නයක් නැහැ,” බැසිල් රාජපක්ෂ රූපවාහිනී වැඩසටහන අතරතුර පැවසීය.
