දේශබන්දු අත්අඩංගුවට ගන්න ආණ්ඩුවට ඕන නැති බව තහවුරුයි. අතුරු තහනමක් ඉල්ලා දේශබන්දුගෙන් රිට් පෙත්සමක්
දේශබන්දු තෙන්නකෝන් පොලිස්පතිවරයා අත්අඩංගුවට ගැනීමේ සූදානමක් පොලීසිය සතු නොවන බව මාධ්‍යවේදී ශ්‍රී ලාල් ප්‍රියන්ත තම යූ ටියුබ් නාලිකාව ඔස්සේ හෙලිදරව් කරන ලද අතර, ඔහු සහ ටිරාන් අලස් අතර පවතින සම්බන්ධය මෙන්ම ටිරාන් අලස් සහ ජනාධිපති අනුර අතර පවතින නොසෑහෙන මිත්‍රකම හේතුවෙන් කිසිම දිනෙක දේශබන්දු තෙන්නකෝන් අත්අඩංගුවට ගන්නේ නැති බව පාඨලී චම්පික හිටපු මන්ත්‍රීවරයා ද කියා තිබිණ. කෙසේවෙතත්, මහජන ආරක්ෂාව සම්බන්ධයෙන් සිටින නියෝජ්‍ය අමාත්‍ය සුනිල් වටගල නම් සුපුරුදු පරිදි කට මැත දොඩවමින් කියා සිටියේ දේශබන්දු භාර නොවන්නේ නම්, ඔහුගේ දේපල පවරා ගැනීමක් සිදු කල හැකි බව ය. එය තවත් කල් මැරීමකට කරන උත්සාහයක් බව ඉතා ම පැහැදිලි ය, එනම්; දේපල පවරා ගැනීමකට යාම සඳහා විශාල කල් ගත වන ක්‍රියාදාමයක් සිදු කළ යුතු වන බැවිනි. සැබැවින්ම ආණ්ඩුවට දේශබන්දු තෙන්නකෝන් අත්අඩංගුවට ගැනීමේ උවමනාවක් නැති බවත්, අවශ්‍ය වූයේ දේශබන්දුට කාලය ලබා දීමක් කිරීම පමණක් බවත් සනාථ වන පුවතක් දැන් වාර්තා වී තිබේ. එය පහතින්..
මාතර මහේස්ත්‍රාත් අධිකරණය විසින් දී ඇති නියෝගය අත්හිටුවීමේ අතුරු තහනම් නියෝගයක් නිකුත් කරන ලෙස ඉල්ලා පොලිස්පති දේශබන්දු තෙන්නකෝන් විසින් සිය නීතිඥවරු මාර්ගයෙන් අභියාචනාධිකරණයට රිට් පෙත්සමක් ඉදිරිපත් කර තිබේ.
ඒ අනුව එම පෙත්සම අද (10) අභියාචනාධිකරණයේ වැඩබලන සභාපති මොහොමඩ් ලෆාර් තාහීර් සහ සරත් දිසානායක යන අභියාචනාධිකරණ විනිසුරු මඩුල්ල ඉදිරියේ සලකා බැලීම සඳහා කැඳවා තිබේ.
අදාළ වග උත්තරකරුවන්ට නොතීසි ලබාදීමෙන් අනතුරුව පෙත්සම සලකා බැලීම සඳහා ලබන 12 වැනිදා කැඳවන ලෙස අභියාචනාධිකරණය නියෝග කර තිබේ.
