දේශබන්දු තෙන්නකෝන්ට කාලය ලබා දෙන ආණ්ඩුවේ තවත් සෙල්ලමක්..!
මාතර මහේස්ත්‍රාත් අධිකරණය විසින් දී ඇති නියෝගය අත්හිටුවීමේ අතුරු තහනම් නියෝගයක් නිකුත් කරන ලෙස ඉල්ලා පොලිස්පති දේශබන්දු තෙන්නකෝන් විසින් සිය නීතිඥවරු මාර්ගයෙන් ඊයේ (10) අභියාචනාධිකරණයට රිට් පෙත්සමක් ඉදිරිපත් කළේ ය.
කෙසේවෙතත්, දේශබන්දු අත්අඩංගුවට ගැනීම සම්බන්ධයෙන් ආණ්ඩුව පාර්ශවයෙන් කි‍යැවුනු අදහස්වලින් බොහෝ දුරට පැහැදිලි වූයේ දේශබන්දු තෙන්නකෝන් අත්අඩංගුවට ගැනීමේ සැබෑ උවමනාවක් රජයට හෝ පොලීසියට නොමැති බව ය. කෙසේවෙතත් දැන් කියවෙන කතාව අනුව දේශබන්දු තෙන්නකෝන් අත් අඩංගුවට ගැනීම සඳහා මුලින් ම පොලීසිය විසින් කළ යුතුව තිබුණේ දේශබන්දු තෙන්නකෝන්ගෙන් ප්‍රකාශයක් ලබා ගැනීම ය. පොලිස් ක්‍රියාවලිය අනුව එසේ පළමුව සිදු කළ යුතුව තිබුණ ද, ඔවුන් කර ඇත්තේ දේශබන්දු තෙන්නකෝන් අත් අඩංගුවට ගැනීමට සොයන බව ප්‍රකාශ කිරීම ය. එසේ ප්‍රකාශ කිරීමට හේතුව දේශබන්දු තෙන්නකෝන්ට නීතිමය වශයෙන් රැකවරණය ලබා ගැනීමට අවශ්‍ය කාලය ලබා දීමට බව පැහැදිලි ය.
එපමණක් නොව, අප මින් පෙර ප්‍රකාශ කළ පරිදි ආණ්ඩුවේ පොලීසිය භාර නියෝජ්‍ය ඇමැතිවරයා වන සුනිල් වටගල ප්‍රකාශ කළේ දේශබන්දු තෙන්නකෝන් භාර වූයේ නැත්නම්, ඔහුගේ දේපළ රාජසන්තක කල හැකි බව ය. මේ සම්බන්ධයෙන් ද, තතු දත් නීතීඥවරුන් ප්‍රකාශ කරන්නේ එසේ අතුරුදන් පුද්ගලයෙකුගේ දේපළ හිතුමනාපයට රාජසන්තක කිරීම සඳහා ප්‍රමාණවත් නීතිමය ප්‍රතිපාදන හෝ හැකියාවක් නොමැති බව ය. එමෙන්ම ඒ සඳහා වන ක්‍රියාවලියට සෑහෙන කාලයක් ගත වන බව ය. මින් පැහැදිලි වන්නේ ද, දේශබන්දුට කාලය ලබා දීම ආණ්ඩුව විසින් සිදු කරන බව ය. අප මින් පෙර සඳහන් කළ පරිදිම, හිටපු අමාත්‍ය ටිරාන් අලස් සමග ජනාධිපති අනුර ප්‍රමුඛ ආණ්ඩුවේ පවතින ලබැඳියාව ද මීට හේතු වී ඇති බව දේශපාලන ආරංචි මාර්ග පෙන්වා දෙයි.
ගණේමුල්ල සංජීව ඝාතනයේ සැකකාරියක් වන සෙව්වන්දි නමැත්තිය සොයා ගැනීමට ද, තවමත් පොලීසියට හැකි වී නැත. ඇය ඉන්නා තැනක් සොයා දෙන කෙනෙකුට මුදල් ත්‍යාග දෙන බව ද කියා තිබේ. එහෙත් පොලිස්පති දේශබන්දු සිටින තැන සොයා දෙන්නෙකුට, ආරංචියක් ලබා දෙන්නෙකුට මුදල් ත්‍යාග ලබා දෙන බවක් පොලීසියෙන් ප්‍රකාශ කොට නැත. හේතුව තවත් පැහැදිලි ය.
දේශබන්දු තෙන්නකෝන් අරබයා ක්‍රියාත්මක වන පොලීසියේ ක්‍රියාකලාපය ජනතා විමුක්ති පෙරමුණ ප්‍රමුඛ ජාතික ජන බලවේග ආණ්ඩුවේ සැබෑ දේශපාලන නිරුවත පෙන්නුම් කරන්නක් බව කිව යුතු ය.
