නීතිවිරෝධී ගිනි අවි ගැන දෙන ඔත්තුවට ලොකු ලොකු ගණන්. මේ ඔත්තුවට කීයක් ගෙවනවද?

නීතිවිරෝධී ගිනි අවි සම්බන්ධ ඔත්තු ලබාදෙන අයට මුදලින් ත්‍යාග පිරිනැමීමට ජනතා විමුක්ති පෙරමුණ ප්‍රමුඛ ජාතික ජන බලවේග ආණ්ඩුව සූදානම් වෙයි. ඒ අනුව

1. ටී-56 ගිනි අවි රු. 750,000ක් (සැකකරුවෙකු සමග) සහ රු. 500,000 (සැකකරුවෙකු නොමැතිව)
2. පිස්තෝල රු. 350,000 (සැකකරුවෙකු සමග) සහ රු. 300,000 (සැකකරුවෙකු නොමැතිව)
3. රිවෝල්වර රු. 250,000 (සැකකරුවෙකු සමග) සහ රු. 150,000 (සැකකරුවෙකු නොමැතිව)
4. රිපීටර් තුවක්කු රු. 75,000 (සැකකරුවෙකු සමග) සහ රු. 30,000 (සැකකරුවෙකු නොමැතිව)
5. විදේශීය නිෂ්පාදිත පතොරොම් තුවක්කු රු. 30,000 (සැකකරුවෙකු සමග) සහ රු. 20,000 (සැකකරුවෙකු නොමැතිව)
6. මෙරට නිෂ්පාදිත වෙනත් ඕනෑම තුවක්කුවක් රු. 20,000 (සැකකරුවෙකු සමග) සහ රු. 15,000 (සැකකරුවෙකු නොමැතිව)
7. විදේශීය නිෂ්පාදිත අත්බෝම්බ රු. 30,000 (සැකකරුවෙකු සමග) සහ රු.20,000 (සැකකරුවෙකු නොමැතිව)

යනාදී වශයෙන් වූ තොරතුටු දන්නේ නම් පොලීසිය දැනුම්වත් කරන ලෙස ඉල්ලා තිබේ.

මෙය ඉතා යහපත් වර්ධනයක් බව එක හෙලා කිව යුතුය. රජයේ ආරක්ෂක අංශ සහ නීත්‍යානුකූලව යම් යම් තත්ත්වයන් යටතේ බලපත්‍ර සහිතව ගිනි අවි ළඟ තබා ගැනීමට අමතරව, වෙනත් පාර්ශව විසින් ළඟ තබා ගන්නා ගිනි අවි නොතිබිය යුතු ය. එම පාර්ශව‍යන් හැර අනෙක් පිරිස නිරායුධ කිරීම වැදගත් සහ ආණ්ඩුවක් විසින් සිදු කළ යුතු කරුණකි.

කෙසේවෙතත්, 1986-89 කාල සීමාව තුළ ආණ්ඩුවේ හමුදාවලට අමතරව අනෙකුත් සන්නද්ධ කණ්ඩායම් සතුව පැවති ගිනි අවි රාජසන්තක කිරීමට පැවති රජයන් කටයුතු කළ ද, එය 100%ක් සාර්ථක නොවූවකි. පාතාල ජාවාරම්කරුවන් සහ අපරාධකරුවන් අත තවමත් ගිනි අවි ගැවසෙන්නේ එබැවිනි.

දැන් පවතින්නේ ජනතා විමුක්ති පෙරමුණ ප්‍රමුඛ ජාතික ජන බලවේග ආණ්ඩුවකි. පාතාල සහ අනෙකුත් සන්නද්ධ කණ්ඩායම් නිරායුධ කිරීම හා සමාන ම කටයුත්තක් ආණ්ඩුවේ හිස මත පවතින නමුත් ඒ පිළිබඳ ආණ්ඩුව උනන්දුවක් දක්වන බවක් පෙනෙන්නට නැත.

ධර්මන් වික්‍රමරත්න විසින් ප්‍රකාශිත ‘ජවිපෙ 2 වැනි කැරැල්ල’ කෘතියට අනුව 87/89 කැරැල්ල නිමාවෙන් පසු 1990 මාර්තු වන විට ආරක්ෂක අංශ සහ ජනයාගෙන් ජනතා විමුක්ති පෙරමුණේ කැරලිකරුවන් විසින් පැහැරගන්නා ලද ටී 56 ගිනි අවි 172ක්, එස්.එම්.ජී. අවි 2, රිපිටර් තුවක්කු 162 ක්, පතරොම් තුවක්කු 250, ගල් කටස් 1257, පිස්තෝල 63 ක්, රිවෝල්වර 54 ක් සොයා ගත් බව ප්‍රකාශ විය.

ආරක්ෂක අමාත්‍යාංශ තොරතුරු අනුව කැරලිකරුවන් විසින් පැහැරගත් 1990 අවසානය වන විට සොයා ගැනීමට නොහැකි වූ විශාල අවි ප්‍රමාණයක් විය. එසේ සොයා නොගත් අවි අතර; ටී 56 අවි 78, එස්.එල්.ආර්. 60, එස් 84 අවි 36, එස්.එම්.ජී අවි 3, එස්.ඒ.ආර්. 4, පිස්තෝල 2, රිවෝල්වර 31, 22 රයිෆල් 11, 303 රයිෆල් 360, රිපීටර් 305, ෂොට්ගන් 223 ක් ඇතුළු අවි 2,136 ක් විය.

එසේ අස්ථානගත වූ ගිනි අවි සම්බන්ධයෙන් තොරතුරු වත්මන් ආණ්ඩුවේ නායකයින් සතුව පවතිනවාට සැකයක් නැත. එබැවින් ඒවා සොයා ගැනීමේ වැඩිම හැකියාවක් පවතින්නේ පවතින ජනතා විමුක්ති පෙරමුණු ආණ්ඩුව සතුව ය. එමෙන්ම ඔත්තු සඳහා ලබා දෙන ත්‍යාග මුදල් මගින් අමතර ආදායමක් සොයා ගැනීමේ හැකියාව පවතින්නේ බලය හොබවන පාර්ශවයට සහ ඔවුන්ගේ හිතවතුන්ට ය. ඒ අනුව, මෙසේ පැහැරගත් ගිනි අවි සම්බන්ධයෙන් විශාල තොරතුරු ප්‍රමාණයක් ශ්‍රී ලංකා පොලීසිය වෙත ලැබීමට අමතරව, යුගයක් බිය වැද්දූ ආයුද දැරූ කණ්ඩායම්වලට තමන් පාපයෙන් මිදෙනවා කෙසේවෙතත්, දැන්වත් තමන්ගේ අත්වල තිබෙන ලේ සෝදාගැනීමට ද මෙය මහඟු අවස්ථාවක් වනු ඇත.