විජේවීර ඝාතනය ගැන ජවිපෙ නිහඬ ඇයි?
පහුගිය 07 වෙනිදා ජාතික නිදහස් පෙරමුණේ නායක විමල් වීරවංශ ලියපු “සඳේ ගින්දර” සාහිත්‍ය කෘතිය එළිදැක්වීමේ උත්සවය තිබුණා. එතනදී විමල් ජවිපෙ සම්බන්ධව හෙලිදරව් කිරීම් කීපයක්ම කළා. ඒ සියල්ල මීට අවුරුදු කීපයකට උඩදී රටේ රාළ විසින් හෙලි කළා. විමල්ගේ මේ හෙලිදරව් කිරීම පෞද්ගලිකව රටේ රාළට වැදගත් වෙන්නේ රටේ රාළ කියපු සියල්ල ඇත්ත බව මේ හෙළිදරව් කිරීම්වලින් තහවුරු වෙන හින්දයි.
තවත් ඉස්සරහට යනකොට විමල්ව ඝාතනය කරන්න ජවිපෙ දරපු උත්සාහය ගැනත් විමල්ට හෙළි කරන්න වෙයි. ඒ ගැන අවස්ථා කීපයකදීම රටේ රාළ කරුණු අනාවරණය කළා. සඳේ ගින්දර කෘතිය එළි දැක්වීමේ උත්සවයේදී විමල් කිව්වේ ජවිපෙ ඇතුලේ බෝල්ෂෙවික් පක්ෂය නමින් අභයන්තර පක්ෂයක් තිබුණ බවයි. අද අනුරගේ කැබිනට් එකේ ඉන්න ගොඩදෙනෙක් ඒ ගැන දැනගෙන හිටියේ නෑ.විමල්ගේ ඊළඟ චෝදනාව උනේ ජවිපෙ ඉතිහාසය ටිල්වින්ලට අවශ්‍ය විදිහට වෙනස් කළා කියලයි.
1994ට පෙර ජවිපෙ නැවත ආරම්භ කරන්න එකතුවුන කාඩර්වරුන්ගේ එකතුවට කිව්වේ ගුලිය කියලා. පසුකාලීනව ජවිපෙ ශක්තිමත්ව වැඩෙද්දී ජවිපෙ පස්වෙනි පන්තියේ සදහන් වෙන විදිහේ විප්ලවයට නායකත්වය දෙන්න පුළුවන් පක්ෂයක් ගොඩනැගීමේ අවශ්‍යතාවය මතුවුනා. බෝල්ෂෙවික් පක්ෂය නමින් පටන් ගන්නේ ඒ පක්ෂයයි. ඒ කියන්නේ සමාජවාදී සමාජ විප්ලවයට නායකත්වය දෙන්න ජවිපෙ ඇතුලේම ජවිපෙට හොරෙන් පක්ෂයක් හැදුවා.
විප්ලවයට නායත්වය දෙන්න පැවතින ජවිපෙ සුදුසු නෑ කියලා එදා ජවිපෙ නායකයන් තීරණය කළා. බෝල්ෂෙවික් පක්ෂයේ බහුජන ව්‍යාපාරය ජවිපෙ බව සලකමින් ජවිපෙ සාමාජිකයාට හොරෙන් බෝල්ෂෙවික් පක්ෂය ගොඩනැගීම ආරම්භ කළා. බෝල්ෂෙවික් පක්ෂයේ සාමාජිකයන් විදිහට තොරගත්තේ ජවිපෙ දියුණුතම සහ විශ්වාසවන්තම කාඩර්වරුයි. ඒ වෙනුවෙන් තෝරාගත්ත සාමාජිකයන් ටිල්වින් කරන සම්මුඛ පරීක්ෂණයෙන් සමත් වෙන්නත් ඕනි.
ඒ සම්මුඛ පරීක්ෂණයෙන් අසමත් උන කීපදෙනෙකුත් හිටියා. ඊට අදාල සම්මුඛ පරීක්ෂණ තිබුනේ ජවිපෙ මූලස්ථානයේවත් නෙවෙයි .ඒ තරම් බෝල්ෂෙවික් පක්ෂය සම්බන්ධව රහස්‍යභාවය ජවිපෙ ආරක්ෂා කළා. ගොඩක් සම්මුඛ පරීක්ෂණ තිබ්බේ ගොඩගම තිබුන කාන්තා මූලස්ථානයේ. ටිල්වින්ට තමන්ගේ පක්ෂ මුලස්ථානයට වඩා විශ්වාසයක් පක්ෂයේ ද්වීතික සංවිධානයක් උන කාන්තා සංගමය ගැන තිබුණා.
මේ සම්මුඛ පරීක්ෂණ අවසානයේ දස දහස් ගාණක් වූ ජවිපෙ සාමාජිකයින් අතරින් 104 දෙනෙක් තෝරා ගත්තා. ඒ 104 දෙනා අතර විමල් සහ විමල් කියන හොඳ බිමලුත් හිටියා. රටේ රාළත් ඒ 104 දෙනා අතර හිටියා. පළවෙනි බෝල්ෂෙවික් පක්ෂ සම්මේලනයේදී පක්ෂයේ නිලධාරී මණ්ඩලය තෝරගත්තා .සභාපති උනේ නන්දන ගුණතිලක. ප්‍රධාන ලේකම් සෝමවංශ අමරසිංහ.අනුර කුමාර භාණ්ඩාගාරික ලෙසත් පත්වුනා.
ටිල්විනුත් තනතුරක් දරමින් ඒ මූලික table එකේ හිටියා. පළවෙනි බෝල්ෂෙවික් පක්ෂ සමුළුවේ එක ප්‍රධාන කාර්ය්‍යක් උනේ 1971ක අරගලයේ ස්වයංවිවේචනය සිදුකිරීමයි. පුරා දින දෙකක් තිස්සේ ඒ ස්වයංවිවේචනය බෝල්ෂෙවික් පක්ෂයේ සාමාජිකයන් විසින් කළා. 71ක අරගලයේ ස්වයංවිවේචනයේදී ඉරි ගහලා ද්‍රෝහියෝ සහ වීරයෝ වෙන් කළා. ඊට පස්සේ 2007 අවුරුද්දේ අවසාන කාර්තුවේ බෝල්ෂෙවික් පක්ෂයේ තවත් සමුළුවක් කැදෙව්වා.
විමල් ඒකටත් සහභාගී වුනා. ගිය 07 වෙනිදා සඳට ගින්දර තබමින් විමල් ජවිපෙ ගැන කියපු කතාව සම්පූර්ණ ඇත්ත. ඒත් ඒකේ පැටළිලි සහිත තැන් කීපයක් තියනවා. ඒක නිසා ඒ කතාව හරියට නිරවුල් කරන්න ඕනි කියලා රටේ රාළ කල්පනා කළා. 2007 දී කැඳවපු බෝල්ෂෙවික් පක්ෂ සමුළුවේ මූලික කාර්ය්‍යක් උනේ 88/89 අරගලයේ ස්වයංවිවේචනය අවසන් කිරීමයි. එතනදී විජේවීර ප්‍රමුඛ ජවිපෙ දේශපාලන මණ්ඩලය ඝාතනය උන හැටි ගැන සාකච්ඡා කළා. කොහොම උනත් 71 අරගලය වගේ 88/89 අරගලය ගැන අවසානාත්මක විග්‍රහයකට එන්න බැරිවුනා.
විජේවීර පාවා දුන්නේ කවුද කියන සාකච්ඡාවේදී ඒ සම්බන්ධව චෝදනා එල්ල උනේ ඩී.එම් ආනන්දට. ඒ කියන්නේ ටිල්වින්ගේ ඉහල සංවිධායකයාට. කොහොම උනත් ඒක ඒ විදිහටම පිලිගන්න ටිල්වින් කැමති උනේ නෑ. සෝමවංශගෙන් සහ නන්දන ගුණතිලකගෙන් ඊට ලොකු බලපෑමක් ආවෙත් නෑ. අනුර මුලික table එකේ හිටියත් අනුර ඒවාට සංවේදී උනේ නෑ. ඒකටත් හේතුවක් තිබුණා, ඊට ඉස්සෙල්ලා තිබුණ බෝල්ෂෙවික් පක්ෂ සමුළුවටත් පක්ෂයේ අයවැය ඉදිරිපත් කරන්න භාණ්ඩාගාරික විදිහට අනුරට බැරිවුණා.
මේ සමුළුවටත් ඒක ඉදිරිපත් කරන්න බැරී නිසා අනුර හිටියේ වෙන ලෝකෙක වගෙයි රටේ රාළට මතක. එදා රාත්‍රියේ රටේ රාළ සහ අනුර එකම මේසය යට නිදාගත්තා මතකයි. මේ සමුළුවට විජේවීර ඝාතනය ඇසින් දුටු ඉන්ද්‍රානන්දත් සහභාගිවුනා. සමුළුවේ බහුතරයකගේ යෝජනාව උනේ 88/89යේදී සිද්ධි උනදේ ගැන ඇත්ත දැනගන්න ඕනි කියලයි. ඇත්ත දැනගන්න දැනට තියෙන සාක්ෂි ප්‍රමාණවත් බව එතන බහුතරයකගේ අදහස වුනා.
එතනදී ඉන්ද්‍රානන්ද, ප්‍රේම කුමාර ගුණරත්නම්, බිමල්, දිමුතු ආටිගල ඒ ස්ථාවරය නියෝජනය කරමින් කතා කළා. හැබැයි ටිල්වින්ගේ පැහැදිලි කිරිම උනේ කරුණු නොදැන හරි කවුද, වැරදි කවුද කියලා කියන්න බෑ කියලයි. ඇත්ත හොයාගෙන යන යෝජනාවට ටිල්වින් සපෝට් කළේ නෑ. ඒක නිසා 88/89යේදී ජවිපෙ දේශපාලන මණ්‌ඩල ඝතනය කිරීම ගැන හරි අදහසක් අදත් ජවිපෙට නෑ.
රටේ රාළ අදත් විශ්වාස කරන්නේ ටිල්වින් හිතාමතාම ඒ ඇත්ත අනාවරණය වෙන්න ඉඩ දුන්නේ නෑ කියලයි. 88/89 ජවිපෙ දේශපාලන මණ්ඩලය ඝාතනය ටිල්වින්ලට ඕනි විදිහේ ප්‍රබන්ධයක් බවට පත් කළා. රටේ රාළ අදත් විශ්වාස කරන්නේ ඒ පාවාදුන් ඉතිහාසයට ටිල්වින් සම්බන්ධ නොවුනත් ටිල්වින්ගේ ඉහල සංවිධායකයා ඊට සම්බන්ධයි කියලයි. ටිල්වින් කළේ ඒ පාවාදීම වහන එකයි. ඒකට හේතුව වෙනම කතා කරමු.
-රටේ රාළ-
